ಅಮ್ಮನಿಲ್ಲದ ಗಣಪತಿ ಹಬ್ಬ ... !

 ಅಣ್ಣನಿಲ್ಲದ ಗಣಪನ ಹಬ್ಬ

ಯಾಕೆ ಮಗು....  ಅಣ್ಣನಿಲ್ಲದ ಹಬ್ಬದ ಬಗ್ಗೆ ಬರೆದಿದ್ದೆ... ನಾ ನಿಲ್ಲದ ಹಬ್ಬದ ಬಗ್ಗೆ ಬರೆಯೊಲ್ವೇ.. 

ಅಮ್ಮ ಭಕ್ತ  ಕುಂಬಾರ ಚಿತ್ರದಲ್ಲಿ ಅಹಂ ತುಂಬಿದ್ದ ನಾಮದೇವರು ಗುರುವಿನ ಹುಡುಕಾಟದಲ್ಲಿದ್ದಾಗ ಲಿಂಗದ ಮೇಲೆ ಕಾಲಿಟ್ಟು ಮಲಗಿದ್ದ ವೃದ್ಧರನ್ನು ಕಂಡು ಕುಪಿತಗೊಂಡು.. ಮಾತಾಡಿಸಿದಾಗ... ಶಿವನಿಲ್ಲದ ತಾಣದಲ್ಲಿ ನೀನೆ ಇದಪ್ಪ ಅಂದಾಗ.. ಕಾಲನ್ನು ಇಡುವೆಡೆಯೆಲ್ಲಾ ಶಿವಲಿಂಗವೇ ಕಾಣುತ್ತದೆ.. ಅಜ್ಞಾನದಿಂದ ಕಣ್ಣು ಕುರುಡಾಗಿದ್ದ ನಾಮದೇವರ ಅಹಂ ಇಳಿಯುತ್ತದೆ.. ಶಿವನಿಲ್ಲದ ತಾಣವೆಲ್ಲಿದೆ.. ಅಹಂ ಇಂದ ತುಂಬಿದ್ದ ನನ್ನ ತಲೆಯೇ ಶಿವನಿಲ್ಲದ ತಲೆ ಎಂದು ತನ್ನ ತಲೆಯ ಮೇಲೆ ಆ ಗುರುಗಳ ಕಾಲನ್ನು ಇಟ್ಟುಕೊಳ್ಳುತ್ತಾನೆ.. 

ಆಹಾ ರಾಜಕುಮಾರ್ ಸಿನಿಮಾ ಅಂದರೆ ಸಾಕು.. ಯಾವುದೋ ಒಂದು ದೃಶ್ಯವನ್ನು ಎಳೆದು ಜೋಡಿಸಿಬಿಡುತ್ತೀಯ.. ಹರಿ ಕತೆ ಬೇಡಾ.. ಯಾಕೆ ಬರೆದಿಲ್ಲ ಹೇಳು.. ನನ್ನ ನೆನಪಿಲ್ಲವೇ.. 

ಅಮ್ಮ ಆ ದೃಶ್ಯದಲ್ಲಿ ಬರುವ ಹಾಗೆ ಅಣುಕಣದಲ್ಲಿ, ಸಕಲ ಚರಾಚರ ವಸ್ತುಗಳಲ್ಲಿ ಶಿವನಿರುವ ಹಾಗೆ.. ನಿನ್ನ ನನೆಪು ಅನುದಿನವೂ, ಅನುಕ್ಷಣವೂ ಇದ್ದೆ ಇರುತ್ತದೆ.. ಮರೆತಿದ್ದರೇ ತಾನೇ ನೆನಪು ಮಾಡಿಕೊಳ್ಳುವುದು.. 

ಮಗು ಇದು ಭಾದ್ರಪದ ಮಾಸ ಶ್ರಾವಣಮಾಸವಲ್ಲ ... ಹರಿಕತೆ ಬೇಡಾ.. ಸೀದಾ ವಿಷಯಕ್ಕೆ ಬಾ.. 

ಸರಿ ಅಮ್ಮ.. 

********** 

ಜೇನಿನ ಗೂಡಿನಲ್ಲಿ ಜೇನು ನೊಣಗಳು ಅವಿರತವಾಗಿ ಕೆಲಸ ಮಾಡುತ್ತಾ ತಮ್ಮ ಗೂಡನ್ನು ಭದ್ರ ಮಾಡುತ್ತಲೇ, ಜೀವನಕ್ಕೆ ಒಂದು ಗೂಡು ಕಟ್ಟುವ ಹಾಗೆ ಅಮ್ಮನ ಅವಿರತ ಹೋರಾಟದ ಶ್ರಮ ನಮ್ಮ ಮನೆ ಮನಗಳನ್ನು ಎತ್ತಿ ಹಿಡಿದಿಟ್ಟಿದೆ.. 

ಹಿಂದಿನ ಒಂದೆರಡು ವಾರಗಳ ಮುಂಚೆ ಹತ್ತಿಯನ್ನು ನೆನೆಸಿ.. ಅದಕ್ಕೆ ಬಣ್ಣ ಹಾಕಿ.. ಅಚ್ಚುಕಟ್ಟಾದ ಹತ್ತಿಯ ಎಳೆಗಳನ್ನು  ಮಾಡಿ.. ಅದನ್ನು ಚೆನ್ನಾಗಿ ಒಣಗಿಸಿ .. ಅದಕ್ಕೆ ಒಂದು ರೂಪು ಕೊಟ್ಟಾಗ ಮನಸ್ಸಿಗೆ ಸಂತೋಷ.. 

ಅಷ್ಟೆಲ್ಲಾ ಸಿದ್ಧವಾಗಿದ್ದರೂ.. ಅದಕ್ಕೆ ವರ್ತಿ ತಗಡು ತಂದು.. ಎಲೆಯ ಆಕಾರದಲ್ಲಿ ಕತ್ತರಿಸಿ ಅದರ ಮೇಲೆ ಗೊಂದು ಹಚ್ಚಿ..ನಕ್ಕಿಯನ್ನು ಹಾಕಿ.. ಅದು ಗಟ್ಟಿಯಾಗಿ ಹಿಡಿದಿಟ್ಟುಕೊಳ್ಳುವಂತೆ ಸ್ವಲ್ಪ ಓಡಾಡ ಸ್ಥಳದಲ್ಲಿ ಇಟ್ಟರೆ.. ಒಂದು ಹಂತ ಮುಗಿಯುತ್ತಿತ್ತು.. 

ಮಾರನೇ ದಿನ ಬೆಳಿಗ್ಗೆ ಅಪ್ಪನೇ ಅರ್ಥಾತ್ ಅಣ್ಣನೇ ಗೌರಿ ಪೂಜೆ ಮಾಡಿಸಿ.. ಅಮ್ಮ ಕಷ್ಟ ಪಟ್ಟು ಮಾಡಿದ್ದ ಹತ್ತಿಯ ಎಳೆಗಳ ಮೇಲೆ.. ಯಥೇಚ್ಛವಾಗಿ ನೀರು ಚುಮುಕಿಸಿ ಅಮ್ಮನ ಉರಿಗಣ್ಣಿಗೆ ಪಾತ್ರವಾಗುತ್ತಿದ್ದರು.. ಹ ಹ ಹ ಹ 

ಗೌರಿ ಹಬ್ಬದ ಪೂಜೆಗೆ ಬೇಕಾದ ಸಕಲ ಸಿದ್ಧತೆಗಳನ್ನು ಒಬ್ಬರೇ ಆರಾಮಾಗಿ ಮಾಡುತ್ತಾ.. ಗೌರಿ ಬಾಗಿನ ಜೊತೆ ಮಾಡಿ.. ಪೂಜೆ, ನೈವೇದ್ಯ ಎಲ್ಲದ್ದಕ್ಕೂ ಒಬ್ಬರೇ ಸಾಹಸ.. ಆಗಾಗ ಅಕ್ಕ ಅಮ್ಮನಿಗೆ ನೆರವಾಗುತ್ತಿದ್ದರೂ ಅಮ್ಮನದು ಒನ್ ವುಮನ್ ಷೋ ಯಾವಾಗಲೂ.. ಅವರ ತಲೆಯಲ್ಲಿ ಅಡಿಗೆ ಬೇಯುತಿತ್ತು.. ಅದೇ ರೀತಿ ಅಡಿಗೆ ಸಿದ್ಧವಾಗುತ್ತಿತ್ತು.. 

ಮುಂದೆ ಸೊಸೆಯಂದಿರು ಬಂದ ಮೇಲೆ.. ಅಕ್ಕನ ಜೊತೆಯಲ್ಲಿ ಸೊಸೆಯಂದಿರಿಗೂ ಕೆಲಸ ಹಚ್ಚಿದರೂ ಮೇಲ್ವಿಚಾರಣೆ ಅಮ್ಮನದೆ ಇರುತ್ತಿತ್ತು,.. 

ಗೌರಿ ಹಬ್ಬದಲ್ಲಿ ನಾವು ಅಣ್ಣ ತಮ್ಮಂದಿರ ಪಾತ್ರ ಕಡಿಮೆ.. ನಾವೇನಿದ್ದರೂ.. ಚೀರ್ ಬಾಯ್ಸ್.. ಅಣ್ಣ ಅದನ್ನು ಕೊಡು.. ಹೂವು ಕೊಡು.. ಅದು ಇದು ಎಂದಾಗ ನಾವುಗಳು ಕೈ ಹಾಕುತ್ತಿದ್ದೆವು.. ಇಲ್ಲದೆ ಹೋದರೆ.. ಆರಾಮಾಗಿ ಗೌರಿ ಪೂಜೆ ನೋಡುತ್ತಾ... ಎಷ್ಟು ಹೊತ್ತಿಗೆ ತಿಂಡಿ ಸಿಗುತ್ತದೆಯೋ ಅಂತ ಕಾಯುವ ಕಾಯಕ ನಮ್ಮದು... 

ಸಂಜೆ ಆಗುತ್ತಲೇ ನಾವುಗಳು ಅರಳಿದ ಹೂಗಳಾಗುತ್ತಿದ್ದೆವು.. ಅಪ್ಪನಿಲ್ಲದ ಗಣಪತಿ ಹಬ್ಬದ ಬಗ್ಗೆ ಆರಂಭದಲ್ಲಿ ಕೊಂಡಿಯನ್ನು ಕೊಟ್ಟಿದ್ದೇನೆ ಅಲ್ಲವೇ.. ಸಂಜೆ ಗಣಪತಿ ತಂದು... ಅದಕ್ಕೆ ಅಪ್ಪನ ಜೊತೆ ಕೂತು ಮಂಟಪ ಸಿದ್ಧ ಮಾಡಿ.. ಮನಸ್ಸಿಗೆ ತೋಚಿದ ಅಲಂಕಾರ ಮಾಡುವ ಹೊಣೆ ನಮ್ಮದಾಗಿರುತಿತ್ತು.. 

ಜೊತೆಯಲ್ಲಿ ಅಮ್ಮನ ಹತ್ತಿಯ ಎಳೆಗಳಿಗೆ ಫೈನಲ್ ಟಚ್ ಕೊಡುವ ಸಾಹಸಕ್ಕೆ ನಾವುಗಳು ಕೈ ಹಾಕಿ ಮೈ ಕೈಯೆಲ್ಲ ಗೊಂದು ಮಾಡಿಕೊಂಡು ಕೈ ತೊಳೆದುಕೊಳ್ಳೋಕೆ ಹೆಣಗಾಡುತ್ತಿದ್ದೆವು. 

ಅಮ್ಮ ಬೆಳಿಗ್ಗೆ ಪೂಜೆಗೆ ಬೇಕಾದ ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಂಡು.. ಮಲಗುವ ಹೊತ್ತಿಗೆ ತಡರಾತ್ರಿಯಾಗಿರುತ್ತಿತ್ತು.. ಕಣ್ಣು ಮುಚ್ಚಿದ ತಕ್ಷಣ ಅದ್ಯಾವ ಮಾಯೆಯಲ್ಲಿ ಬೆಳಗಾಗುತಿತ್ತೋ ಆ ದೇವರಿಗೆ ಗೊತ್ತು.. ಬೆಳಿಗ್ಗೆ ಬೇಗ ಎದ್ದು... ಜಳಕ ಮಾಡಿ.. ಮತ್ತೆ ಅಡಿಗೆ ಮನೆಯ ಸಾಮ್ರಾಜ್ಯಕ್ಕೆ ಲಗ್ಗೆ ಇಡುತ್ತಿದ್ದರು.. ಮೋದಕ, ಕರಿಗಡುಬು, ನಮ್ಮ ನೆಚ್ಚಿನ ಉದ್ದಿನ ಕಡುಬು, ಕೋಸಂಬರಿ, ಪಲ್ಯ, ಅನ್ನ, ಸಾರು, ಹುಳಿ, ಸಾಮಾನ್ಯ ಮಾವಿನಕಾಯಿ ಚಿತ್ರಾನ್ನ, ಮಜ್ಜಿಗೆ, ಖಾರವಾದ ಚಟ್ನಿ.. ಆಹಾ ಈಗ ನೆನೆದರೂ ಬಾಯಲ್ಲಿ ನೀರು ಬರುತ್ತದೆ.. 

ಏಕಾಂಗಿಯಾಗಿ ಎಲ್ಲವನ್ನೂ ಸಿದ್ಧಮಾಡಿ.. ಮಹಾ ಮಂಗಳಾರತಿಯ ಹೊತ್ತಿಗೆ ಸರಿಯಾಗಿ ಕರಿಗಡುಬು ಕರಿಯಲು ಮತ್ತೆ ಉದ್ದಿನ ಕಡುಬಿಗೆ ಹಾಳೆಯನ್ನು ಒತ್ತಿ ಬೇಯಿಸಲು ಸಿದ್ಧಮಾಡುತ್ತಿದ್ದರು.. ಅಣ್ಣ ಜೋರಾಗಿ ಕೂಗೋದು.. ಮಂಗಳಾರತಿ ಬಾ.. ಅದೇನು ಅಡಿಗೆ ಮನೆಯಲ್ಲಿಯೇ ಇರುತ್ತೀಯೋ.. ಬಾ ಬೇಗ ಅಂತಾ ಕೂಗಿದಾಗ.. ಅಡಿಗೆಯನ್ನು ಯಾರು ಮಾಡುತ್ತಾರೆ ಅಂತ ಅಮ್ಮ ಗೊಣಗುತ್ತಲೇ ಬರೋದು.. ನಾವುಗಳು ಅಮ್ಮನನ್ನು ಸಮಾಧಾನ ಪಡಿಸುತ್ತಾ.. ನೈವೇದ್ಯಕ್ಕೆ ಇಟ್ಟಿದ್ದ ಪದಾರ್ಥಗಳನ್ನು ಆಸೆಗಣ್ಣಿನಿಂದ ನೋಡುತ್ತಾ.. ಎಷ್ಟು ಹೊತ್ತಿಗೆ ಹೊಟ್ಟೆಗೆ ಇಳಿಸುತ್ತೇವೆ ಅಂತ ಹೊಂಚು ಹಾಕುತ್ತಾ ಇರೋದು.. 

ಅಮ್ಮನಿಂದ ಮಹಾಮಂಗಳಾರತಿ ಅಣ್ಣನಿಗೆ ಮೊದಲು ನಂತರ ಅಣ್ಣನಿಂದ ಗಣಪನಿಗೆ ಆದ ಮೇಲೆ.. ಬಂದ ಪುರೋಹಿತರಿಗೆ ನಮಸ್ಕರಿಸಿ.. ಅವರು ಇನ್ನೂ ಬಾಗಿಲನ್ನು ದಾಟಿರುತ್ತಾ ಇರಲಿಲ್ಲ.. ಆಗಲೇ ಅಡಿಗೆ ಮನೆಗೆ ಲಗ್ಗೆ.. ಒಂದೆರಡು ಕರಿಗಡುಬು ಹೊಟ್ಟೆಗೆ ಇಳಿಸಿದ್ದೆ ತಡ.. ಜೊತೆಯಲ್ಲಿ ಖಾರವಾದ ಚಟ್ನಿಗೆ  ಬಿಸಿ ಬಿಸಿ ಸುಡುತಿದ್ದ ಉದ್ದಿನ ಕಡುಬನ್ನು ಅದ್ದಿ ತಿಂದಾಗ ಆಹಾ.. 

ಆಮೇಲೆ ಅಮ್ಮ ಎಲ್ಲರಿಗೂ ತಿಂಡಿ ಎಲೆಯಲ್ಲಿ ಹಾಕಿ ಬಿಸಿ ಬಿಸಿ ಕಡುಬು, ಒಂದೆರಡು ಮೋದಕ, ಕರಿಗಡುಬು ಕೊಡುತ್ತಿದ್ದರು.. ಕಡಿಮೆ ತಿನ್ನಿ ಊಟ ಮಾಡಬೇಕು ಎಂದರೂ ಕೇಳದೆ ಗಣಪನ ಹೊಟ್ಟೆಯಷ್ಟೇ ನಮ್ಮ ಹೊಟ್ಟೆಯೂ ಡೊಳ್ಳು ಹೊಟ್ಟೆಯಾಗಬೇಕು ಅಷ್ಟು ಒಳಗೆ ಇಳಿಸಿ.. ಹೊರಗಡೆ ಆಟವಾಡಲು ಹೋಗುತ್ತಿದ್ದೆವು.. 

ಘಮಘಮಿಸೋ ಊಟ ಮಾಡಿ.. ನೆಲಕ್ಕೆ ಹೊಟ್ಟೆ ತಾಗಿಸಿಕೊಂಡು ಮಲಗಿದರೆ ಆಹಾ ಎದ್ವಾ ತದ್ವಾ ನಿದ್ದೆ.. 

ಎಳ್ರೋ.. ಸಂಜೆಯಾಯಿತು.. ದೀಪ ಹಚ್ಚಬೇಕು.. ಅನ್ನುವಾಗಲೇ ಎಚ್ಚರ.. ಕಪ ಕಪ ಮೊಗ ತೊಳೆದು.. ಮನೆಯ ಹತ್ತಿರ ಕೂರಿಸಿದ್ದ  ಗಣಪತಿ ಪೆಂಡಾಲುಗಳಿಗೆ ಹೋಗಿ.. ಅಲ್ಲಿ ಕೊಡುವ ಚರ್ಪುತಿಂದು .. ಮತ್ತೆ ಮನೆಗೆ ಬಂದ ಮೇಲೆ.. ಶ್ಯಮಂತಕೋಪಾಖ್ಯಾನ ಕತೆ ಕೇಳಿ... ಚರ್ಪು ರೂಪದಲ್ಲಿ ಅಮ್ಮ ಮಾಡಿದ ಕಡಲೆ ಹಿಟ್ಟು.. ಇಲ್ಲವೇ ಕಡಲೆ ಕಾಳಿನ ಹುಸ್ಲಿ ಹೊಟ್ಟೆಗೆ ಇಳಿಸಿ.. ಗಣಪತಿಯನ್ನು ಮನೆಯ ಹತ್ತಿರದ ಬಾವಿಯಲ್ಲಿ ವಿಸರ್ಜನೆ ಮಾಡಿ.. ರಾತ್ರಿ ಊಟ ಮಾಡಲು ಆಗದೆ ಇದ್ದರೂ... ತಣ್ಣಗಾಗಿದ್ದರೂ ರುಚಿಸುವ ಕಡುಬು ತಿಂದು  ಮಲಗಿದರೆ ಗಣಪತಿ ಹಬ್ಬ ಸಮಾಪ್ತಿ.. 

ಮುಂದೆ ಅಮ್ಮನ ಕೆಲಸ ಶುರುವಾಗುತ್ತಿತ್ತು... ಅಡಿಗೆ ಮನೆಯ ಪಾತ್ರೆಗಳು.. ಪೂಜಾ ಸಾಮಗ್ರಿ ಎಲ್ಲವನ್ನೂ ಅಚ್ಚುಕಟ್ಟಾಗಿ ಸರಿ ಮಾಡಿ.. ಮತ್ತೆ ಅವರು ಮಲಗುವ ಹೊತ್ತಿಗೆ ತಡ ರಾತಿ  ಮಾರನೇ ದಿನಕ್ಕೆ  ಮತ್ತೆ ಕಾಯುವ ಕಾಯಕ... !

******

ಮಕ್ಕಳ ಮರೆತಿಲ್ಲ ಮರೆಯೋದಿಲ್ಲ.. ನನಗೆ ಗೊತ್ತು ಸುಮ್ಮನೆ ಕಾಲೆಳೆದು ನೋಡಿದೆ ಅಷ್ಟೇ.. ನಾ ನಿಲ್ಲದ ಮೊದಲ ಗಣಪತಿ ಹಬ್ಬಕ್ಕೆ ನೀವೆಲ್ಲರೂ ಕೂಡಿರುವುದು ನೋಡಿ ಖುಷಿಯಾಗಿದೆ.. ನಮ್ಮ ಅನುಗ್ರಹ ಸದನದ ಪುರೋಹಿತ ಶಾಮಣ್ಣ ಇನ್ನೇನು ಬರುತ್ತಿದ್ದಾನೆ.. ಪೂಜೆ ಮಾಡಿ.. ಗಣಪನ ಕೃಪೆಯಿಂದ ನಮ್ಮ ಅನುಗ್ರಹ ಸದನ ಸದಾ ಬೆಳಗುತ್ತಲಿರಲಿ.. ಶುಭವಾಗಲಿ.. !

ನೀ ಮುಡಿದ ಮಲ್ಲಿಗೆ.....!

ನೀ‌‌ ಮುಡಿದ ಮಲ್ಲಿಗೆ ಹೂವಿನ‌ ಮಾಲೆ

ನಿನಗೆಂದೇ ಬರೆದ ಪ್ರೇಮದ ಓಲೆ...!

ನೀ‌ ಮುಡಿದ ಮಲ್ಲಿಗೆ ಹೂವಿನ‌ ಮಾಲೆ..                          ನಿನಗೆಂದೇ ಬರೆದ ಪ್ರೇಮದ ಓಲೆ..

ರೇಡಿಯೋದಲ್ಲಿ ಗಾಂಧಿನಗರ ಚಿತ್ರದ ಅಣ್ಣಾವ್ರ ಹಾಡು ಬರುತಿತ್ತು..

ಮಲ್ಲಿಗಿ‌ ಮಾಲಿ ತನ್ನಿ...

ಯಾಕೋ...

ಮುಂಜಾನೇ ಯಾಕೋ ಅನಿಸಿತು ಇವತ್ತು ಮಾಲಿ‌ ಮುಡೀಬೇಕು ಅಂತ...!

ಅಯ್ಯೋ ರಾಣಿ ನಿನಗೋಸ್ಕರ ಚಂದ್ರನನ್ನೇ ತರುವೇ ಎನ್ನುವಾಗ ಮಲ್ಲಿಗೆ ಹೂವು ತಾನೆ..ತರ್ತೀನಿ ಬಿಡು...

ಕಿಸಿಕಿಸಿ‌ ನಗಿಸಿ ಹೊರಟೇ..

ಮಳೆ ಶುರುವಾಯ್ತು...

ನನ್ನ ಒಲವಿನ ಹುಡುಗಿ ಮೊದಲ ಬಾರಿ ಹೂವು ಬೇಕೆಂದು ಕೇಳಿದಳು...ಸೀದಾ ಅಣ್ಣಾವ್ರ ಹಾಡೇ ನೆನಪಿಗೆ ಬಂದಿತ್ತು...

ಒಳ ಉಡುಪು ನೆಂದು ಹೋಗುವಷ್ಟು ಜೋರಾದ ಮಳೆ...ಆದರೆ ಹೃದಯದಲ್ಲಿ ಪ್ರೇಮದ ಅಲೆಗಳ ಬೋರ್ಗರೆತದ ಮುಂದೇ ಈ ಮಳೆಯ ಹನಿಗಳು ಏನು ಅಲ್ಲಾ...

ಹೃದಯದ ರಾಣಿ ಕೇಳಿದ ಹೂವನ್ನು ಅರಸುತ್ತಾ ಹೋದೆ..ಅಂದು ಭಾನುವಾರ..ಮದುವೆ..ಮುಂಜಿ..ಪೂಜೆ..ಅದು ಇದು ಅಂತ ಹೂಗಳ ಅಂಗಡಿಗಳು ಬಿಕೋ‌ ಎನ್ನುತ್ತಿದ್ದವು...ಕೆಲವು ಅಂಗಡಿಗಳಲ್ಲಿ ಹೂವಿದ್ದವು...ಆದರೆ ಆಗಲೆ ಅಂತಿಮ ಘಟ್ಟ ಮುಟ್ಟಲು ಸಿದ್ಧವಾಗಿದ್ದಂತೆ ಕಾಣುತ್ತಿತ್ತು..

ಯಾಕೋ ಮನಸ್ಸು ಬರಲಿಲ್ಲ...ನನ್ನ ಹುಡುಗಿ ಮೊದಲ ಬಾರಿಗೆ ಬೇಕು ಅಂದಿದ್ದಾಳೆ ನಿರಾಸೆ ಮೂಡಿಸಲು ಮನಸ್ಸಾಗದೇ..ಆ ಮಳೆಯಲ್ಲಿಯೇ ಅಲೆದೆ...

ಬೈಕು ನೆಂದ ನಾಯಿಯಾಗಿತ್ತು..ಹೆಲ್ಮೆಟ್ ಹಾಕಿದ್ದರು ಆ ಹೊರಗಿನ‌‌ ಮಳೆಯ ಭೋರ್ಗರೆತ ತಲೆಯನ್ನು ಪೂರ್ತಿ ಒದ್ದೆ ಮಾಡಿತ್ತು...

ಅನತಿ ದೂರದಲ್ಲಿ ಒಂದು ಹಣ್ಣು ಹಣ್ಣು ಅಜ್ಜಿ ತಲೆ ಮೇಲೆ ಒಂದು ಪ್ಲಾಸ್ಟಿಕ್ ಹಾಳೆಯನ್ನು ಹಾಕಿಕೊಂಡು ತನ್ನ ಮುಂದೆ ಒಂದು ಬುಟ್ಟಿಯಲ್ಲಿ ಒಂದೆರೆಡು ಮಳ ನಳ ನಳಿಸುವ ಮಲ್ಲಿಗೆ ಹೂಗಳ ಮಾಲೆಯನ್ನು ತೆಳುವಾದ ಪ್ಲಾಸ್ಡಿಕ್ ಕವರಿನ ಹಾಳೆಯಿಂದ ಮುಚ್ಚಿದ್ದು ಕಂಡಿತು..

ನನ್ನ ಬೈಕ್ ನನ್ನ ಮಾತು ಕೇಳದೆ ಅಜ್ಜಿ ಮುಂದೆ ಬಂದು ನಿಂತಿತು...

ಏನಪ್ಪ ಪೂರಾ ನೆಂದು ಹೋಗಿದ್ದೀಯಲ್ಲ..ಸ್ವಲ್ಪ ನಿಂತು ಹೋಗಬಾರದಿತ್ತೆ...ಈ ಆಕಾಲಿಕ ಮಳೆಯಲ್ಲಿ ನೆಂದರೆ ತಲೆನೋವು..ಶೀತ..ಜ್ವರ..ಬರುತ್ತದೆ ಕಣಪ್ಪ..

ಇಲ್ಲ ಅಜ್ಜಿ ನನ್ನ ಮಡದಿ ಎಂದೂ ಕೇಳದವಳು ಇಂದು ಮಲ್ಲಿಗೆ ಹೂವು ಬೇಕು ಎಂದಳು...ಪೇಟೆಯೆಲ್ಲಾ ಸುತ್ತಿದೆ...ಯಾಕೋ ಗಮನ ಸೆಳೆಯುವ ಹೂವು ಸಿಗಲಿಲ್ಲ....ಸದಾ ನನ್ನ ಮಾತು ಕೇಳುವ ಬೈಕ್.. ಅರಿವಿಲ್ಲದೇ‌ ಸೀದಾ ನಿನ್ನ ಮುಂದೆ ಬಂದು ನಿಂತಿದೆ...ಪ್ರೀತಿಯ ಮಡದಿಯ ಆ ನಿರ್ಮಲ ಪ್ರೀತಿಯ ಜ್ಯೋತಿ ಒಳಗೆ ಬೆಳಗುತ್ತಿರುವಾಗ..ಈ ಚಳಿ..ಮಳೆ ಏನು ಮಾಡುತ್ತದೆ ಅಜ್ಜಿ...

ಹೌದಾ ಅಪ್ಪ...ಅನ್ಯೋನ್ಯ ಜೋಡಿ ಅನಿಸುತ್ತೆ..ಸದಾ ಸುಖವಾಗಿರಿ...ಅಂದ ಹಾಗೆ ಎಷ್ಟು ಮಳ ಬೇಕಪ್ಪ...?

ಅಜ್ಜಿ ಕುಕ್ಕೆಯಲ್ಲಿ ಎಷ್ಟಿದೆ...

ಒಂದೆರೆಡು ಮೂರು ಮಳ ಇದೆಯಪ್ಪ...ಏನು‌ ಮಾಡಲಿ ಇದನ್ನ ಮಾರಿ ಬಂದ ಹಣ ಕೊಟ್ಟರೆ ಮಾತ್ರ ಮನೆಯಲ್ಲಿ ಊಟ...ಇಲ್ಲದೇ ಇದ್ರೇ ಹೊಟ್ಟೆಗೆ ಲಾಟರಿ ಕಣಪ್ಪ..

ಕರುಳು ಚುರ್ ಅಂತು...ಅಜ್ಜಿಯ ಕಥೆಯನ್ನು ಕೇಳುವ ಆಸೆಯಿದ್ದರೂ‌ ಅದನ್ನು ಕೇಳಿ ಅಜ್ಜಿ ಮನಸ್ಸಿಗೆ ನೋವು ಕೊಡಬಾರದು...ಜೊತೆಯಲ್ಲಿ ಮಳೆಯ ಕಾರಣ ಅಜ್ಜಿ ನೊಂದು ಅತ್ತರೂ ಮಳೆ ಹನಿಗಳ‌ ಜೊತೆಯಲ್ಲಿ ಕಣ್ಣೀರು ಕರಗುತ್ತದೆ...ಬೇಡವೆಂದು...ಮನಸ್ಸಿಗೆ ಹೇಳಿಕೊಂಡು ಅಜ್ಜಿ ತಗೋ...ಎಂದು ಪರ್ಸನಲ್ಲಿ ಐದು ನೂರುಗಳ ಐದು ನೋಟು ಕೊಟ್ಟು.. ಜೊತೆಯಲ್ಲಿ ಮೂರು ಮಳದ ದುಡ್ಡು ಬೇರೆ ಕೊಟ್ಟಾಗ...ಬೇಡಪ್ಪ‌ ...ಇದಿಷ್ಟೇ ಹೂವಿನ‌ದ್ದು ಮಾತ್ರ ಸಾಕು...ಇದು ಬೇಡ ಅಂದಳು ಸ್ವಾಭಿಮಾನಿ ಅಜ್ಜಿ...

ಮರು ಮಾತಾಡದೆ..ದುಡ್ಡು ಪಡೆದು ಹೂವನ್ನು ಇಟ್ಟುಕೊಂಡು...ರಸ್ತೇ ಎಂದು ನೋಡದೇ ಅಜ್ಜಿಗೆ ನಮಸ್ಕರಿಸಿ ಹೊರಟೆ..

ಮನೆಗೆ ಬಂದು ಮಲ್ಲಿಗೆ ಹೂವು ಕೊಟ್ಟಾಗ ಅವಳ‌ ಮುಖ ಅರಳಿತ್ತು..ನನ್ನ ಹೃದಯ ಅಣ್ಣಾವ್ರ "ಹೃದಯದಲಿ ಇದೇನಿದು ನದಿಯೊಂದು ಓಡಿದೆ..." ಹಾಡು..

ಜೀವನ ಸುಂದರ ಅಂತ ಅನಿಸೋದು ಈ ರೀತಿಯ ಪುಟ್ಟ ಪುಟ್ಟ ಸಂತಸದ ಸಂಗತಿಗಳಿಂದ...

ಇಬ್ಬರಿಗೂ ಖುಷಿಯಾಯಿತು...ಆದರೆ ಬರುವಾಗ ಮಳೆಯ ಹನಿಗಳಲ್ಲಿ ಬೆರೆತ ಕಣ್ಣೀರಿನ ಪ್ರತಿ ಹನಿಗಳು ಅಜ್ಜಿಗೆ ಒಂದು ಕಲ್ಪವೃಕ್ಷದಂತಹ ಛಾಯೆ ನೀಡಬೇಕು‌‌ ಅನಿಸಿತು...

ಮಲ್ಲಿಗೆ ಹೂವನ್ನು ಕಂಡ ಮಡದಿ..

Thank you... Very nice..Thanks for loving me so much...Love you too... 

ಮಳೆ ನೀರಲ್ಲಿ ನೆಂದರೂ ಅದು  ಪ್ರೇಮದ ಅಲೆಯ ಮುಂದೆ ಏನು ಅನ್ನಿಸಲಿಲ್ಲ ಅಂತ ಹೇಳಿದ್ದು ತುಂಬು ಭಾವನೆಯಲ್ಲಿ ಬಂದ ಮಾತು..ನಿಮ್ಮ ಈ ಪ್ರೀತಿಯನ್ನು ಪಡೆಯುವುದು ತುಂಬಾ ಭಾಗ್ಯದ ಮಾತಾಗಿದೆ..

ನಿಜಕ್ಕೂ ನೀವು ತಂದು ಕೊಟ್ಟ ಮಲ್ಲಿಗೆ ಹೂವಲ್ಲಿ ಅಳೆಯಲು ಆಗದ ಪ್ರೀತಿ..ನಿಜಕ್ಕೂ  ಇಂಥಹ ಘಳಿಗೆಗಳು ತುಂಬಾ ಖುಷಿ ನೀಡುತ್ತವೆ..

ಭಗವಂತನ ಮನೆಯಲ್ಲಿ ನಿಮ್ಮ ನಿಸ್ವಾರ್ಥ ಸೇವೆ ನಿಜಕ್ಕೂ ಹೆಮ್ಮೆಯ  ಮಾತು..ಅದು ಅಷ್ಟು ಸರಳವಾಗಿ ಯಾರಿಗೂ ಮನದಲ್ಲಿ ಬರುವುದಿಲ್ಲ..

ಅದರ ಜೊತೆಗೆ ನನಗೆ ಇನ್ನೊಂದು ಖುಷಿ ಕೊಡುವ ಮಾತೆಂದರೆ ನಾನು ಮೆಚ್ಚಿದ  ಪ್ರೀತಿಗೆ ಸ್ವಯಂ ಪರಮಾತ್ಮನು ಮೆಚ್ಚಿಕೊಂಡು ಆರಿಸಿದನಲ್ಲಾ ಅಂತ ತುಂಬಾ ಹೆಮ್ಮೆ ಆಗುತ್ತದೆ. ಇದೊಂದು  ಚಮತ್ಕಾರದ ಮಾತು.ಜೊತೆಗೆ  ಇಡೀ ವಸುದೈವ ಕುಟುಂಬ ನಿಮ್ಮನ್ನು ಇಷ್ಟ ಪಡುತ್ತದೆ  ಅದೂ ಕೂಡಾ ತುಂಬಾ ಹೆಮ್ಮೆಯ ಮಾತು..

Love you a lot .It's really god made pair..🥰

ಅಜ್ಹಿಯ ಬದುಕಿನ ಕತೆ ಕಣ್ಣೀರು ತರಿಸಿದರೆ ಮಡದಿಯ ಪ್ರೀತಿಯ ಮಾತುಗಳು ಪನ್ನೀರು ತರಿಸಿತು...

ಕಣ್ಣೀರು.ಪನ್ನೀರಿನ ಉಗಮ ಸ್ಥಾನ ಕಣ್ಣುಗಳೇ ಆದರೂ ಅದಕ್ಕೆ ಸಿಗುವ ಸನ್ನೆಗಳು ಹೃದಯದಿಂದ...ಎರಡರ ರುಚಿಯೂ ಉಪ್ಪೇ ಆದರೂ‌ ಅದು‌ ಕೊಡುವ ಅನುಭವ ಭಿನ್ನ...

ಅಜ್ಜಿಯ ಕಥೆ ಸಂಕ್ಷಿಪ್ತವಾಗಿ ಹೇಳಿದೆ ಕೊಂಚ ಹಣ ಸಹಾಯವನ್ನೂ ಕೂಡ ನಯವಾಗಿ ಬೇಡ ಎಂದಿದ್ದರ ಬಗ್ಗೆಯೂ ಹೇಳಿದೆ..

ಯಾವಾಗಲೂ‌ ಮಿಂಚಿನಂತೆ ಯೋಚಿಸುವ...ಲಕ್ಷ್ಮಣ ರೇಖೆ..ಆ ರೇಖೆ..ಈ‌ ರೇಖೆ ಎಂಬ ನಿಯಮಗಳ ಬಗ್ಗೆ ತಲೆ ಕೆಡಿಸಿಕೊಳ್ಳದ ನನ್ನ ಹುಡುಗಿ...ಮೂರು ದಿನದಲ್ಲಿ‌ ಆ ಅಜ್ಜಿಗೆ ಒಂದು ಭಧ್ರತೆ ನೀಡಿದಳು...

ಅಜ್ಜಿ ಈಗ ನೆಮ್ಮದಿ ಕೇಂದ್ರದಲ್ಲಿ ಭಗವಂತನ ಜ್ಞಾನದ ಹಾದಿಯಲ್ಲಿ ಸಂತೃಪ್ತ ಜೀವನ ನೆಡೆಸುತ್ತಿದ್ದಾಳೆ..

ನಾವು ನೋಡಲು ಹೋದಾಗಲೆಲ್ಲಾ..ಮಲ್ಲಿಗೆ ಮಾಲಿ ನನ್ನಾಕೆಗೆ...ಆ ಪರಿಮಳ ನನ್ನ ಹೃದಯಕ್ಕೆ...!

ಒಂದು ಅನುಭವ....ಪದಗಳಲ್ಲಿ‌ ಮೂಡಿಸುವ ಪ್ರಯತ್ನ...!!!

"ಅಣ್ಣಾ ಈಗ ಸಮಯ ಎಷ್ಟು?"

"ಅಕ್ಕ ವಾಚ್ ನಿಂತು ಹೋಗಿದೆ!!!"

ಒಂದು ಮುಗುಳುನಗೆಯ ದೋಣಿ ಎರಡೂ ಕಡೆ ಹಾಯ್ದು ಹೋಯ್ತು.. 

"ಅಣ್ಣಾ ನಿಮಗೆ ಹೇಗೆ ಅನ್ನಿಸುತ್ತೋ ಹಾಗೆ ಅಲಂಕಾರ ಮಾಡಿ.. ನೋಡಿ ಅಲ್ಲಿ ಇದೆ.. ಇಲ್ಲಿ ಇದೆ" 

ಅಷ್ಟೇ ಹೇಳಿದ್ದು.. 

ಆನಂದ್ ಭಾಯ್ ಜೊತೆ ಇದ್ದರು.. ಅವರ ಕೈಗೆ ನನ್ನ ಕೈ ಜೋಡಿಸಿದೆ.. 

ಆನಂದ್ ಭಾಯ್  ಅಲ್ಲಿದ್ದ ಪರಿಕರಗಳನ್ನು ಒಂದೊಂದಾಗಿ ತೆಗೆದು ಕೊಡುತ್ತಿದ್ದರು.. ನನಗೆ ಅನಿಸಿದಂತೆ, ಅಲ್ಲಿದ್ದ ಉಳಿದ ಅಕ್ಕಂದಿರು ಹೇಳಿದಂತೆ ಒಂದೊಂದೇ ಜೊತೆಯಾಗಿ.. ಸುಂದರವಾದ ಅಂಗಣ ಇನ್ನಷ್ಟು ಸುಂದರವಾಗಿ ಸಜ್ಜಾಗುತಿತ್ತು.. ಶೋ ಕೇಸ್ ನೋಡಿದಾಗ ಏನೋ ಖಾಲಿ ಖಾಲಿ ಅನ್ನಿಸುತ್ತಿತ್ತು.. ಸರಿ ಇದಕ್ಕೆ ಒಂದು ರೂಪು ಕೊಡೋಣ ಅಂತ.. ನನ್ನ ಸ್ವಲ್ಪ ತರಲೆ ತಲೆಗೆ ಕೆಲಸ ಕೊಟ್ಟೆ..

ಅಣ್ಣಾ ಸ್ವರ್ಗ ಸ್ವರ್ಗ ಸುಂದರವಾಗಿದೆ ಅಂತ ಅಕ್ಕಾ ಹೇಳಿದಾಗ ಮನಸ್ಸು ನಿರಾಳ.. 

ಬೆಳಿಗ್ಗೆ ಬೇಗ ಬನ್ನಿ ಅಣ್ಣ ಅನ್ನುವ ಮಾತಿನೊಂದಿಗೆ ದಿನ ಮುಗಿದಿತ್ತು.. 

ಬೆಳಿಗ್ಗೆ ಹೋದಾಗ.. ಅಣ್ಣಾ ಶಿವಲಿಂಗಕ್ಕೆ ನಿಮಗೆ ಬೇಕು ಅನಿಸಿದ ಹಾಗೆ ಅಲಂಕಾರ ಮಾಡಿ.. ನೋಡಿ ಹೂ ಎಲ್ಲಾ ಇದೆ.. 

ಶಿವನಿಗೆ ಕೈ ಮುಗಿದೆ.. ಕಮಾನ್ ಶ್ರೀ ಅಂದ ಹಾಗೆ ಭಾಸವಾಯಿತು.. 

ಅಲ್ಲಿಂದ ಶುರುವಾಯ್ತು.. ಅಲ್ಲಿದ್ದ ಹೂವುಗಳನ್ನು ಬಿಡಿಸಿ.. ಒಂದೊಂದೇ ಜೋಡಿಸುತ್ತಾ ಹೋದೆ..  ನಮ್ಮ ಬದುಕನ್ನು ರೂಪಿಸುವ ದೇವರಿಗೆ ಒಂದು ಪುಟ್ಟ ಅಲಂಕಾರ.. ಮನಸ್ಸು ನಿರಾಳ.. 

"ಅಣ್ಣ ಬೇಗ ಬನ್ನಿ" ಮತ್ತೊಮ್ಮೆ ಹೆಡ್ ಮೇಡಂ ಉವಾಚ.. 

ಸರಿ ಬೇಗ ಬೇಗ ತಿಂಡಿ ಎಲ್ಲಾ ಸಿದ್ಧ ಮಾಡಿ ಮಗಳ ಜೊತೆ ಹೋದೆ.. ಕ್ಯಾಮೆರಾ ಕಣ್ಣಿಗೆ ಒಂದಷ್ಟು ದೃಶ್ಯಗಳನ್ನು ಸೆರೆ ಹಿಡಿವ ತವಕ.. ಶುರು ಮಾಡಿದೆ.. ಕೆಲವು ಅದ್ಭುತ ಅನಿಸುವ ಫ್ರೇಮುಗಳು ಕ್ಯಾಮೆರಾದೊಳಗೆ ನುಗ್ಗಿತು.. 

ಅಣ್ಣಾ ನೀವು ಹೋಗಿ ರಾಖಿ ಕಟ್ಟಿಸಿಕೊಳ್ಳಿ ಅಂತ ಬಂದ ದನಿಗೆ ತಿರುಗಿ... ಅಲ್ಲಿ ಸದ್ದಿಲ್ಲದೇ, ಕಣ್ಣಿನಲ್ಲಿಯೇ ತಮ್ಮ ಶಕ್ತಿ ಧಾರೆಯೆರೆಯುತ್ತಿರುವ ಮಾತೆಯನ್ನು ಕಂಡಾಗ ಮಾತೆ ಹೊರಬರುತ್ತಿರಲಿಲ್ಲ.. ಮೈಯಲ್ಲಿ ಸಣ್ಣಗೆ ಕಂಪನ.. ಈ ರೀತಿಯ ಅನುಭವ ಹಲವಾರು ಬಾರಿ ಆಗಿದ್ದರೂ, ಪ್ರತಿ ಅನುಭವ ಒಂದು ವಿಭಿನ್ನ ರೂಪ ನೀಡುವುದು ಸಹಜ.. ಸುಮ್ಮನೆ ಅವರನ್ನೇ ನೋಡುತ್ತಾ ಕೂತಿದ್ದೆ.. ಪಕ್ಕದಲ್ಲಿ ಕೂತಿದ್ದವರಿಗೆ ದೃಷ್ಟಿಸಿ.. ತಮ್ಮ ಅನುಭವ ಶಕ್ತಿಯನ್ನು ನೀಡುತ್ತಿದ್ದ ಪ್ರಸಂಗ.. ನಾ ಸುಮ್ಮನೆ ಕಣ್ಣು ಮುಚ್ಚಿ ಆ ದಿವ್ಯ ಅನುಭವದ ತರಂಗಗಳನ್ನು ಆಸ್ವಾದಿಸುತಿದ್ದೆ.. 

ನನ್ನ ಸರದಿ ಬಂತು.. ಕಣ್ಣಿನಲ್ಲಿ ಮಾತೆಯ ಮಮತೆ.. ಕಣ್ಣಿನಲ್ಲಿ ಸಾಂತ್ವನ ನೀಡುತ್ತಿರುವ ಭಾವ.. ಕಣ್ಣಿನಲ್ಲಿ ಶ್ರೀ ಬದುಕು ಸುಂದರವಾಗಿದೆ.. ಜೀವನವೂ ಸುಂದರವಾಗುತ್ತದೆ ಎನ್ನುವ ಆತ್ಮ ವಿಶ್ವಾಸ ಕೊಡುವ ನೋಟ.. ಕಣ್ಣಿನಲ್ಲಿ ಯಾವುದಕ್ಕೂ ಹೆದರಬೇಡ.. ದೇವರಿದ್ದಾನೆ.. ನಿನ್ನ ಜೊತೆ ಎನ್ನುವ ಧೈರ್ಯದ ಮೂಕ ಅಭಿನಯ.. 

ಒಂದು ರೀತಿಯಲ್ಲಿ ಸ್ಕ್ಯಾನ್ ಮಷೀನ್ ನಮ್ಮೊಳಗೇ ಹೋಗಿ.. ಎಲ್ಲಾ ಒಳ್ಳೆಯ ಯೋಚನೆಗೆಗಳನ್ನು ತೊಳೆದು, ಒಗೆದು, ಒಣಗಿಸಿ ಮತ್ತೆ ನಮ್ಮೊಳಗೇ ತುಂಬಿ ಕಳಿಸುವಂತಹ ದೃಶ್ಯವದು.. ಅಬ್ಬಬ್ಬಾ ಎಂದರೆ ನೂರಾ ಇಪ್ಪತ್ತು ಸೆಕೆಂಡುಗಳು ಅಷ್ಟೇ.. ಮನಸ್ಸು ಹಕ್ಕಿಯಾಗಿತ್ತು.. ಎಪ್ಪತೈದು ಕೆಜಿ ತೂಗುವ ದೇಹ.. ಏಳೂವರೆ ಗ್ರಾಂ ಆಗಿದೆ ಅನ್ನುವ ಸುಂದರ ಅನುಭವ.. 

ದೇವರ ಜೊತೆಗಿನ ಭೇಟಿ ಹಾಗೆ ಅಲ್ಲವೇ.. ಏನೂ ಕೇಳದೆ ಎಲ್ಲವನ್ನೂ ಕೊಡುವ ದೈತ್ಯ ಶಕ್ತಿಗೆ ಇನ್ನೊಂದು ಹೆಸರು "ದೇವರು" ಅದನ್ನು ದೇವರು ಅನ್ನುತ್ತೇವೆ, ಬಾಬಾ ಎನ್ನುತ್ತೇವೆ, ಮಹಾಮಹಿಮ ಎನ್ನುತ್ತೇವೆ.. ಆದರೆ ಕಡೆಗೆ ನಿಲ್ಲುವ ಹೆಸರು "ಪರಮಾತ್ಮ"

ಅಂತಹ ದಿವ್ಯ ಅನುಭವವನ್ನು ಮೂಡಿಸಿದ ರಾಜರಾಜೇಶ್ವರಿ ನಗರದ ರಾಜಯೋಗ ಕೇಂದ್ರ್ರ ಅಕ್ಕ ಪ್ರಮೀಳಾ ಅಕ್ಕ ಅವರಿಗೆ ಅನಂತಾನಂತ ಧನ್ಯವಾದಗಳು.. !!! 

ನಾವಿರುವ ಕ್ಷಣವೇ ......ಒಲಿದ ಜೀವ!

ಹನ್ನಾ ಹಾಡುಗಳ‌ ಬಗ್ಗೆ ಒಂದಷ್ಟು ಮಾತು ಹೇಳಿ!

"ಮಾತುಗಳು, ಹಾಡುಗಳು ಹೃದಯದಾಳದಿಂದ ಬರಬೇಕು...ಆಗ ಅದರ ಮಹತ್ವ ಮತ್ತು ಕಾಲಾವಧಿ ಅಧಿಕ"

"ಹೌದು ಹನ್ನಾ ಇವತ್ತು ವಿಶೇಷ ದಿನ...ಮಾಮೂಲಿಗಿಂತ ಏನಾದರೂ ಬೇರೆ ಬರೆಯಿರಿ...!"

"ಹಾ ಕಣೋ...ಬೆಂಕಿಯ ಬಲೆ ಚಿತ್ರದ " ಒಲಿದ ಜೀವ ಜೊತೆಯಲಿರಲು ಬಾಳು ಸುಂದರ " ಇದರಲ್ಲಿ ಎಸ್ಪಿಬಿ "ಒಲಿದ" ಪದದ ಉಚ್ಚಾರಣೆ ಕೇಳು.."

ಬೆಸುಗೆ ಚಿತ್ರದ "ಬೆಸುಗೆ ಬೆಸುಗೆ ಹಾಡಿನ ಅಂತ್ಯದಲ್ಲಿ " ಜನಮು ಜನಮುಕೂ "ಆತ್ಮದ" ಬೆಸುಗೆ..."ಆತ್ಮ" ಪದವನ್ನ ಉಚ್ಚರಿಸುವ ರೀತಿ ಗಮನವಿಟ್ಟು ಕೇಳು"

ಐತ್_ಬಾರ್ ಚಿತ್ರದ "ಕಿಸಿ ನಝರ್ ಕೋ‌ ತೇರಾ" ಹಾಡಿನಲ್ಲಿ ಇತ್ತಿಚೀಗಷ್ಟೇ ನಮ್ಮನಗಲಿದ ಗಾಯಕ ಭೂಪಿಂದರ್ ಸಿಂಗ್ "ಏಹಸಾಅಅಆಆಆಆಆಆಆಸ್" ಎಷ್ಟು ಅರ್ಥಗರ್ಭಿತವಾಗಿ ಹಾಡಿದ್ದಾರೆ...

"ಲಾವಾರಿಸ್ ಚಿತ್ರದಲ್ಲಿ ಬಿಗ್ ಬಿ "ಕಬ್ ಕೆ ಬಿಚಡೇ" ಹಾಡಿನಲ್ಲಿ ನಾಯಕಿಯನ್ನ ನೋಡುವ ಶೈಲಿ‌ ನಿನಗೆ ಬಲು ಇಷ್ಟ...ಈ ಹಾಡು ನಮ್ಮ ಜೀವನ ಗೀತೆಯೂ ಆಗಿದೆ...ಅಲ್ವೇ""

"ಚಂದನದ ಗೊಂಬೆಯ "ಮನೆಯನು ಬೆಳಗಿದೆ ಇಂದು" ಈ ಹಾಡು ನಿನಗೆ ಅರ್ಪಿತ...."

ಥ್ಯಾಂಕ್ ಯೂ ಹನ್ನಾ...ಈ ಹಾಡುಗಳನ್ನು ಕೇಳಿದಾಗೆಲ್ಲ ಮೈ ಜುಮ್ ಎನಿಸತ್ತದೆ...ಎಷ್ಟು ಸೊಗಸಾದ ಹಾಡುಗಳು, ಸಾಹಿತ್ಯ...!ಇನ್ನೂ ಒಂದು ಹಾಡಿದೆ...ನನ್ನಷ್ಟವಾದದ್ದು...ಅದು ಹಾಕಿಲ್ಲ ಇಲ್ಲಿ...?"

"ಸಿಂಗಾರ ಸೀಲಾಅಆಆಆಆಆಆಅಆ' ಅದ್ನ ಮರೆಯೋದು ಸಾಧ್ಯವೇ....ಅದು ಸದಾ ಇರೋ ಕೇಳೋ ಹಾಡದು....!

"ಹ ಹ ಹ ಹ ಹ'

ಬದುಕು ವಿಶೇಷ ಅನಿಸೋದು ನಾವು ಮಾಡುವ ಯೋಜನೆಗಳಲ್ಲಿ‌‌ ಧುಮುಕೋದು‌..ಬದುಕಿನ ಪ್ರತಿ ಕ್ಷಣಗಳನ್ನು ನಗು ನಗುತ್ತಾ ಕಳೆವಾಗ...ಅನುದಿನವೂ...ಅನು ಕಣವೂ..ಆನಂದವೇ!"

ವಿಶೇಷ ದಿನಕ್ಕೆ ಸಮಯಕ್ಕೆ ಶುಭಾಶಯಗಳು ಸೀಮು!" 

ಸೀಮಾ +ಸವಿತಾ = ಸೀಮಿತ

ಮೆಟ್ಟಿಲು ಇಳಿಯುತ್ತಿರುವ ಸದ್ದು .. 

ಸೀಮಾ ತನ್ನ ಕ್ಲಿನಿಕ್ಕಿಗೆ ಬಂದ ಅನಾರೋಗ್ಯದ ತಪಾಸಣೆಗೆ ಬಂದಿದ್ದವರ ಹತ್ತಿರ ಮಾತನಾಡುತ್ತಿದ್ದಳು.. ಕರ್ಟನ್ ಹಾಕಿದ್ದರಿಂದ ಹೊರಗೆ ಬಂದವರ ಮುಖ ದರ್ಶನವಾಗಿರಲಿಲ್ಲ.. 

ಬಂದಿದ್ದವರ ಆರೋಗ್ಯದ ತಪಾಸಣೆ ಮಾಡಿ.. ನಿಯಮಿತವಾದ ಆಹಾರ, ಪಥ್ಯ, ಮಾತ್ರೆಗಳು, ಬೆಳಗಿನ ಹೊತ್ತಿನ ವಾಯು ವಿಹಾರ.. ಅದು ಇದು ಅಂತ ಹೇಳಿ.. ಅವರನ್ನು ಬೀಳ್ಕೊಟ್ಟಳು.. 

ಹಿಂದೆ ಉಪಚರಿಸಿದ್ದವರ ಕರೆ ಬಂತು.. ಹಾಗಾಗಿ ಫೋನಿನಲ್ಲಿ ಮಾತಾಡುತಿದ್ದಳು.. ಸುಮಾರು ಹೊತ್ತು ಆದ ಮೇಲೆ.. ಆ ಕರೆಯಲ್ಲಿದ್ದವರು ಸಮಾಧಾನವಾದಂತೆ ಕಂಡಿತು ಅನ್ನಿಸುತ್ತೆ.. ಫೋನ್ ಕೆಳಗಿಟ್ಟು.. ಬಾಯಾರಿಕೆಯಾಗಿದ್ದರಿಂದ ನೀರು ಕುಡಿಯಲು ಹೋದಳು.. 

ಅಲ್ಲಿ ಒಬ್ಬರು ಕುಳಿತಿದ್ದರು.. ಕೋಲು ಮುಖ.. ಲಕ್ಷಣವಾಗಿ ಬಾಚಿದ್ದ ತಲೆಗೂದಲು.. ಜಡೆ ಇತ್ತು.. ಪಂಜಾಬಿ ಶೈಲಿಯ ಚೂಡಿದಾರ.. ಅದರ ಮೇಲೆ ಒಂದು ದುಪ್ಪಟ್ಟ.. ಕೊಂಚ ಅಗಲವಾದ ಹಣೆ.. ಎರಡು ಹುಬ್ಬಿನ ನಡುವೆ ಇಟ್ಟಿದ್ದ ಕೆಂಪನೆ ಬಿಂದಿ.. 

ಸೀಮಾ ಒಂದು ಕ್ಷಣ ಅವಕ್ಕಾದಳು.. 

"ಅರೆ ಸವಿತಕ್ಕ.. ಬಹಳ ಖುಷಿಯಾಯಿತು.. ನಿಮ್ಮನ್ನು ನೋಡಿ.. ವರ್ಷಕ್ಕೆರಡು ಬಾರಿ ನಿಮ್ಮ ದರ್ಶನವಾಗುತ್ತೆ.. ಆದರೆ ನಿಮ್ಮ ನೆನಪು ಸದಾ ಇರುತ್ತೆ.. ಶ್ರೀ ನಿಮ್ಮ ಫೋಟೋ ನೋಡದೆ ಯಾವುದೇ ಕೆಲಸ ಮಾಡೋಲ್ಲ.. ನೀವು ನಿಮ್ಮ ಮನೆಗೆ ಶಕ್ತಿ.. ಆ ಶಕ್ತಿಯೇ ನನಗೆ ಶ್ರೀ ರಕ್ಷೆ.. "

"ಸೀಮಾ ನೀವು ಎಷ್ಟು ಚಂದ ಕಾಣಲಿಕ್ಕೆ ಹತ್ತೀರಿ.. ಗುಂಡು ಗುಂಡು ಮುಖ.. ಪುಟ್ಟ ಪುಟ್ಟ ಕಣ್ಣುಗಳು.. ಪುಟ್ಟ ಬಾಯಿ... ಕಂದು ಬಣ್ಣದ ಕಣ್ಣುಗಳು.. ಸುಂದರಿ ನೀವು.. "

"ಸವಿತಕ್ಕ ಇದೇನು ನೀವು ತಾವು ಅಂತ ಕರೀತಾ ಇದ್ದೀರಾ.. "

"ಸೀಮಾ ಸುಮ್ಮನೆ ಹಾಗೆ ಕರೆದೆ.... ಹೇಗಿದ್ದೀಯಾ.. ಹೇಗೆ ನೆಡೀತ ಇದೆ ಕ್ಲಿನಿಕ್.. ನಿನ್ನ ನಗು ಮೊಗ ನೋಡಿದರೆ ಸಾಕು ಬಂದವರ ಆರೋಗ್ಯ ೭೦% ಸುಧಾರಿಸುತ್ತದೆ.. ಇನ್ನೂ ನೀ ಕೊಡುವ ಔಷಧಿ.. ಬೇಗ ಗುಣವಾಗ್ತಾರೆ.. ನಿನ್ನ ಧೈರ್ಯ ನಮ್ಮ ಶ್ರೀಗೆ ಬಲ ಕಣೆ.. ನೀ ಧೈರ್ಯವಾಗಿದ್ದರೆ ನಮ್ಮ ಶ್ರೀ ಧೈರ್ಯವಾಗಿರುತ್ತಾರೆ.. "

"ಹೌದು ಸವಿತಕ್ಕ.. ನಿಮ್ಮ ಮಾತು ನಿಜ ಶ್ರೀಗೆ ಧೈರ್ಯ ಕೊಡ್ತಾನೆ ಇರ್ತೀನಿ.. ಸ್ಪೂರ್ತಿಯಾಗಿ ನೀವಿದ್ದೀರಾ.. ಇನ್ನೇನು ಬೇಕು.. ಸಂಕಷ್ಟಗಳು ಸೂರ್ಯನ ಮುಂದೆ ಮಂಜಿನ ಹನಿಯಾಗುತ್ತದೆ"

"ಎಷ್ಟು ಚೆನ್ನಾಗಿ ಮಾತಾಡ್ಲಿಕೆ ಹತ್ತಿ.. ಸೂಪರ್ ಸೀಮಾ.. ನಿನ್ನ ಮಾತುಗಳು ಕೇಳೋಕೆ ಬಾಳ ಚಂದ"

"ಸವಿತಕ್ಕ ಸಕತ್.. ನಮ್ಮ ಭಾಷೆ ಎಷ್ಟು ಚೆನ್ನಾಗಿ ಮಾತಾಡ್ತೀರಾ.. ಸೂಪರ್"

"ಬೆಳಗಾವಿಯಾದರೇನು ಬೆಂಗಳೂರು ಆದರೇನು ಕಲೀಬೇಕು ಮೊದಲು ಮಾತಾಡಲು.. ಅಂತ ಶ್ರೀ ಯಾವಾಗಲೂ ವಿಷುವರ್ಧನ್ ಚಿತ್ರದ ಹಾಡು ಹೇಳ್ತಾ ಇರ್ತಾರೆ ಅಲ್ಲವೇ.. "

"ಅಯ್ಯೋ ಸವಿತಕ್ಕ ಶ್ರೀ ಬಗ್ಗೆ ಮತ್ತು ಸಿನಿಮಾ ಹಾಡಿನ ಬಗ್ಗೆ ಹೇಳಬೇಡಿ.. ಯಾವ ಹಾಡು ಆದರೂ ಸರಿ ಅದಕ್ಕೆ ತಮ್ಮ ಪದಗಳನ್ನು ಹಾಕಿ ನಗಿಸ್ತಾರೆ.. "

"ನೀನೇನು ಕಮ್ಮಿ ಸೀಮಾ.. ಶ್ರೀ ಗುಡಿ ಕಟ್ಟಿದರೆ ನೀ ಕಳಸ ಇಡ್ತೀಯಾ.. ನಿಮ್ಮಿಬ್ಬರ ಜುಗಲ್ ಬಂದಿ ಬಾಳಾ ಚಲೋ ಇರ್ತಾವೆ.... "

ಇಬ್ಬರೂ ಜೋರಾಗಿ ನಕ್ಕರು.. ಪಾನಿ ಪುರಿ ಗಾಡಿಯ ಸದ್ದಿಗೆ ಇಬ್ಬರೂ ಮುಸಿ ಮುಸಿ ನಕ್ಕು.. ಪಾನಿ ಪುರಿ ಸವಿಯಲು ಇಬ್ಬರೂ ಒಮ್ಮೆ ಆಲಂಗಿಸಿಕೊಂಡು ಹೆಗಲ ಮೇಲೆ ಕೈ ಇಟ್ಟು ಮೆಟ್ಟಿಲು ಹತ್ತಿ ಹೊರಟರು.. !

ಸೀಮಾ +ಸವಿತಾ =  ಸೀಮಿತ  

                                                                          ****

ಜೀವನ ಕಾಲ್ಪನಿಕ ಕಥಾವಸ್ತುವಲ್ಲ ಅಂತಾರೆ.. ಜೀವನ ನಿಜ ಅಂತಾರೆ.. ಆದರೆ ಕಾಲ ತಂದು ಒಡ್ಡಿದ ಪರೀಕ್ಷೆಯಲ್ಲಿ ತೇರ್ಗಡೆಯಾದವರಿಗೆ ಸಾಕ್ಷತ್ಕಾರ ಅಂತ ಅಣ್ಣಾವ್ರು ಸಾಕ್ಷತ್ಕಾರ ಚಿತ್ರದಲ್ಲಿ ಹೇಳಿದಂತೆ.. ಬದುಕು ಕೊಟ್ಟ ಪರೀಕ್ಷೆಯಲ್ಲಿ ಗೆದ್ದವರು ಯಾರೋ.. ಸೋತವರು ಯಾರೋ ಎಂದು ಯೋಚಿಸದೆ... ಬಂದ ಬದುಕನ್ನು ಕಟ್ಟಿ ನೆಡೆವ ಧೈರ್ಯ ಸಿಗುವುದು ಯಾವಾಗ.. ಮನವನ್ನು ಅರಿತ ಸಂಗಾತಿ ಜೊತೆಯಾದಾಗ.. 

ಸವಿತಾ ಸೀಮಾ ಮುಖಾ ಮುಖಿ ಭೇಟಿಯಾಗಲಿಲ್ಲ.. ಆಗಿದ್ದರೆ ಈ ಲೇಖನ ಬರುತ್ತಿರಲಿಲ್ಲ.. ಹ ಹ ಹ.. 

ಪ್ರಶ್ನೆ ಅದಲ್ಲ.. ಕೋ ಕೋ ಆಟದಲ್ಲಿ ಒಬ್ಬರು ಓಡಿ ಓಡಿ ಸುಸ್ತಾಗಿ ಇನ್ನೊಬ್ಬರಿಗೆ ಕೊಕ್ ಕೊಟ್ಟು ಪಂದ್ಯ ಮುಂದುವರೆಸುವಂತೆ.. ನನ್ನ ಬದುಕಲ್ಲಿ ಇರುವ ಇವರಿಬ್ಬರು ನನ್ನ ಬದುಕಿನ ಪಂದ್ಯವನ್ನು ಬೀಳದಂತೆ ಎತ್ತಿ ನಿಲ್ಲಿಸುತ್ತಿದ್ದಾರೆ.. ಇವರ ಜೊತೆಯಲ್ಲಿ ಒಂದು ಕಡೆ ಶೀತಲ್ ಅಪ್ಪ ನಾನಿದ್ದೇನೆ ಜೊತೆಯಲ್ಲಿ ಅಂದರೆ.. ಅತ್ತ ಕಡೆಯಿಂದ ಹಾಯ್ ಅಮ್ಮ ನಾ ನಿನ್ನ ಜೊತೆ ಎಂದು ಐಶ್ವರ್ಯ ಕಿರು ನಗೆ ಬೀರುತ್ತಾಳೆ.. 

ಬದುಕು ಒಂದು ರೈಲು ಬಂಡಿ.. ಇಂಧನ ಹಾಕುತ್ತಲೇ ಇರಬೇಕು.. ಮುಂದೆ ಸಾಗುತ್ತಲೇ ಇರಬೇಕು.. !!

ಇಂದು ಸವಿತಾಳ ಜನುಮದಿನ... ಒಂದು ಸಾರ್ಥಕ ಬದುಕನ್ನು ಕಂಡ ಆ ಮಹಾನ್ ಶಕ್ತಿಗೆ ಒಂದು ಅಭಿನಂದನೆಗಳು.. ಮತ್ತೆ ಸದಾ ನೆನಪಲ್ಲಿ ಇರುವ ಸಾರ್ಥಕತೆ ಅದೇ ಸವಿತಾರ್ಥಕತೆ.. !

ಜನುಮದಿನದ ಶುಭಾಶಯಗಳು ಪಾಪಾ... !!!!

ಶ್ರೀ : 

"ನಿನ್ನೆ ನಿನ್ನೆಗೆ ನಾಳೆ ನಾಳೆಗೆ 
ಇಂದು ನಮ್ಮದೇ ಚಿಂತೆ ಏತಕೆ" (ಸಿಂಗಪೂರ್ ನಲ್ಲಿ ರಾಜಾಕುಳ್ಳ)

ಶೀತಲ್ 

"ಬೆಳ್ಳಿ ಮೂಡಿತು ಕೋಳಿ ಕೂಗಿತು 

ಬಾನಾಗಿ ರಂಗು ಚೆಲ್ಲಿ ತೇರ ನೇರಿ ಸೂರ್ಯ ಬಂದ" (ಕವಿರತ್ನ ಕಾಳಿದಾಸ)

ಶ್ರೀ 

"ಪೂಜಿಸಲೆಂದೇ ಹೂಗಳ "ತಂದೆ"

ದರುಶನ ಕೋರಿ ನಾ ಬಂದೆ" (ಎರಡು ಕನಸು)

ಶೀತಲ್ 

"ನಿನ್ನೊಲುಮೆ ನನಗಿರಲಿ ತಂದೆ 

ಕೈ ಹಿಡಿದು ನೀ ನೆಡೆಸು ಮುಂದೆ" (ನಮ್ಮ ಮಕ್ಕಳು)

ಶ್ರೀ

"ನಗು ನಗುತಾ ನಲಿ ನಲಿ ಏನೇ ಆಗಲಿ" (ಬಂಗಾರದ ಮನುಷ್ಯ)

ಶೀತಲ್  

"ನಗಬೇಕು ನಗಿಸಬೇಕು ಅದೇ ನನ್ನ ಧರ್ಮ" (ನಕ್ಕರೆ ಅದೇ ಸ್ವರ್ಗ)

ಶ್ರೀ 

"ಹರಿ ನಾಮವೇ ಚಂದ ಅದ ನಂಬಿಕೊ ಕಂದ" (ಭಕ್ತ ಕುಂಬಾರ)

ಶೀತಲ್  

"ನಿಮ್ಮ ಕಂಗಳ ಬಿಸಿಯ ಹನಿಗಳು ನೂರು ಕತೆಯ ಹೇಳಿವೆ" (ಬಡವರ ಬಂಧು)

ಶ್ರೀ 

"ನಿನ್ನ ನುಡಿಯು ಜೇನ  ಹನಿಯು ಹೃದಯಕೆ" (ಬಡವರ ಬಂಧು)

ಸೀಮು  

"ಯಾದೊಂಕಿ ಬಾರಾತ್ ನಿಖಲಿ ಹೇ ಆಜ್ ದಿಲ್ ಕೆ ದ್ವಾರೆ" (ಯಾದೊಂಕಿ ಬಾರಾತ್)

ಐಶ್ವರ್ಯ

"ಮಧುಬನ್ ಖುಷ್ಭೂ ದೇತಾ ಹೇ 

ಜೀನಾ ಉಸ್ಕಾ ಜೀನಾ ಹೇ" (ಸಾಜನ್ ಬಿನಾ ಸುಹಾಗನ್)

ಸೀಮು  

ಈ ಚಂದದ ಮನೆಯಲ್ಲಿ ಶ್ರೀಗಂಧದ ಗುಡಿಯಲ್ಲಿ | 

ಆನಂದದ ಹೊಳೆ ಅನುರಾಗದ ಮಳೆ ಎಂದೆಂದೂ ಚಿಮ್ಮುತಿರಲಿ (ಕಪ್ಪು ಬಿಳುಪು)

ಸವಿತಾ 

"ನಮ್ಮ ಸಂಸಾರ ಆನಂದ ಸಾಗರ" (ನಮ್ಮ ಸಂಸಾರ)

****** 

ಜೀವನ ಎಂದರೆ ಚಿತ್ರಗಳ ಗೀತೆಯೇ ಹೌದು.. ಒಂದು ಗೀತೆ ಬದುಕಿನ ಹುಮ್ಮಸ್ಸನ್ನು ಹೆಚ್ಚಿಸುತ್ತದೆ ಎಂದು ಬಲವಾಗಿ ನಂಬಿರುವ ನನಗೆ.... ನನ್ನ ಬದುಕಲ್ಲಿ ಅರಳಿದ ಹೂಗಳು ಕೂಡ ಚಿತ್ರಗಳ ಗೀತೆಗೆ ಮಾರು ಹೋದವರೇ.. ಅವರ ಮನದಾಳದ ಮಾತುಗಳು ಹಾಡಾಗಿ ಬಂದು ನಿಂತು ಈ ಲೇಖನ ಮಾಲೆಯಾಗಿ ಮಾಡಿದೆ.. 

ನನ್ನ ಅದ್ಭುತ ಗೆಳತೀ ಶೀತಲ್ ಹುಟ್ಟಿದ ದಿನ.. ಟೀನ್ ಏಜ್ ಅನ್ನುವ ಸುಂದರ ಯುಗವನ್ನು ದಾಟಿ ಬದುಕಿನ ಯಶಸ್ಸಿನ ಪಯಣದತ್ತ ಮೆಲ್ಲನೆ ಹೆಜ್ಜೆ ಇಟ್ಟಿರುವ ನಿನಗೆ ಜನುಮದಿನದ ಶುಭಾಶಯಗಳನ್ನು ಕೋರಬೇಕು ಎಂದಾಗ ಚಿತ್ರಗಳ ಹಾಡಿನ ಗುಚ್ಛವೇ ಮುನ್ನುಗ್ಗಿ ಬಂತು.. ಅದರ ಪ್ರತಿಫಲ ಈ ಲೇಖನ.. 

ಜನುಮದಿನದ ಶುಭಾಶಯಗಳು ಪಾಪಾ... !!!!

ಅಕ್ಕ ಜನುಮದಿನದ ಶುಭಾಶಯಗಳು... !

ಮಂಕುತಿಮ್ಮ ಸಿನಿಮಾ... ದ್ವಾರಕೀಶ್ ನಾಯಕನಾಗಲು ನಿರ್ಮಿಸಿದ ಚಿತ್ರವಿದು.. 

ಅಕ್ಕ ನನ್ನನ್ನು ಶಿವಮೊಗ್ಗದ ಚಿತ್ರಮಂದಿರಕ್ಕೆ ಆಕೆಯ ಗೆಳತಿಯರ ಜೊತೆ ಕರೆದೊಯ್ದಳು.. ನಾನು ಪಕ್ಕ ಮಂಕುತಿಮ್ಮನಾಗಿದ್ದ ಪ್ರಸಂಗವದು.. ಚಿತ್ರಮಂದಿರದೊಳಗೆ ಚಿತ್ರದ ತುಣುಕುಗಳ ಸ್ಥಿರ ಚಿತ್ರಗಳನ್ನು ನೋಡುತ್ತಾ ನಿಂತಿದ್ದೆ.. ಯಾವುದೋ ಮಾಯದಲ್ಲಿ ತಪ್ಪಿಸಿಕೊಂಡಿದ್ದೆ.. ಇವರೆಲ್ಲಾ ಚಿತ್ರಮಂದಿರದೊಳಗೆ ಹೋದರು .. ನಾನು ಎಲ್ಲಿಗೆ ಹೋಗಬೇಕೆಂದು ಗೊತ್ತಾಗದೆ.. ಟಾಕೀಸಿನ ಹೊರಗೆ ಬಂದೆ.. ಇನ್ನೂ ಚಿಕ್ಕ ವಯಸ್ಸಾದ್ದರಿಂದ ಟಿಕೀಟಿನ ಜಂಜಾಟ ಇರಲಿಲ್ಲ.. ಗೇಟ್ ಕೀಪರ್ ಏನು ಎಂದಾ.. ಹೊರಗೆ ಹೋಗಬೇಕು ಅಂದೇ.. ಬಾಗಿಲು ತೆಗೆದು ಕಳಿಸಿದ.. 

ನಾ ಸೀದಾ ಮನೆಗೆ ಬಂದೆ., ಅಮ್ಮ ಬಿಸಿ ಬಿಸಿ ಕೋಡುಬಳೆ ಮಾಡ್ತಾ ಇದ್ದರು.. ಸರಿಯಾಗಿ ಮುಕ್ಕಿದೆ.. ಸಿನೆಮಾಗೆ ಹೋಗ್ತೀನಿ ಅಂದ್ಯಲ್ಲೋ ಅಂದ್ರು ಅಮ್ಮ.. ಹೋಗಿದ್ದೆ ಅಕ್ಕ ಕಾಣಲಿಲ್ಲ ಮನೆಗೆ ಬಂದೆ .. ಅಂದೇ.. 

ಮನೆಗೆ ಬಂದ ಮೇಲೆ ನನಗೆ ಅಕ್ಕ ಸರಿಯಾಗಿ ಪೂಜೆ ಮಾಡಿದಳು... 

****** 

ನಾ ನಿನ್ನ ಬಿಡಲಾರೆ ಚಿತ್ರ.. ಆ ಕಾಲದಲ್ಲಿ ಸುಮಧುರ ಹಾಡಿಗಷ್ಟೇ ಅಲ್ಲದೆ.. ದೆವ್ವ ಭೂತ ದೇವರು ಇವುಗಳ ಮೇಲೆ ಆಧಾರಿತ ಚಿತ್ರ ಪ್ರೇಕ್ಷಕರ ಮನವನ್ನು ಸೆಳೆದಿತ್ತು.. ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಿದ ಚಿತ್ರವಿದು.. ಅನಂತ್ ನಾಗ್ ಮೈ ಮೇಲೆ ದೆವ್ವ ಬರುವ ದೃಶ್ಯ ಬಂದಾಗಲೆಲ್ಲ.. ಅಕ್ಕ ನನ್ನನ್ನು ಮತ್ತು ನನ್ನ ತಮ್ಮ ಮುರುಳಿಯನ್ನು ಸೀಟಿನ ಕೆಳಗೆ ಮುಖ ಮಾಡಿ ಅಂತ ಹೇಳುತ್ತಿದ್ದಳು.. ಇಡೀ ಚಿತ್ರದಲ್ಲಿ ದೆವ್ವದ ದೃಶ್ಯ ಬಂದಾಗಲೆಲ್ಲ ಇದೆ ಕಾಯಕ ಮುಂದುವರೆಯುತ್ತಿತ್ತು .. 

****** 

ಆಗ ನಾ ಇನ್ನೂ ಚಿಕ್ಕ ಮಗು.. ಅಕ್ಕನಿಗೆ ಆಡುವ ವಯಸ್ಸು... ನನ್ನ ಅಮ್ಮ ನನ್ನನ್ನು ಅಕ್ಕನಿಗೆ ಕೊಟ್ಟು ನೋಡಿಕೋ ಎಂದು ಹೇಳಿ ತಮ್ಮ ಕಾಯಕ ಮಾಡುತ್ತಿದ್ದರು.. ಆಡುವ ವಯಸ್ಸು ಅಕ್ಕನಿಗೆ.. ಅವಳ ಗೆಳತಿಯರ ಜೊತೆ ಕುಂಟೆ ಬಿಲ್ಲೆ, ಕೊಕ್ಕೋ ಆಟದಲ್ಲಿ ನನ್ನನ್ನು ಮರೆಯುತ್ತಿದ್ದಳು.. ಕಲ್ಲು ಬೆಂಚಿನ ಮೇಲೆ ಕೂರಿಸಿ ಆಟವಾಡುತ್ತಿದ್ದಳು.. ನಾನು ಅಲ್ಲಿಂದ ದಬ್ ಅಂತ ಕೆಳಗೆ ಬಿದ್ದು ಬಡ್ಕೋತಾ ಇದ್ದಾಗ ಅಕ್ಕ ಪಕ್ಕದ ಮನೆಯವರು ರೀ ವಿಶಾಲಮ್ಮ ನಿಮ್ಮ ಮಗ ಅಳ್ತಾ ಇದ್ದಾನೆ ನೋಡಿ ಅಂದಾಗ ಅಮ್ಮ ಬಂದು ಅಕ್ಕನಿಗೆ ಪೂಜೆ ಮಾಡುತ್ತಿದ್ದರು.. 

******

ಬಡತನಕ್ಕೆ ಹಸಿವು ಜಾಸ್ತಿ ಅನ್ನುತ್ತಾರೆ.. ಮಗು ಅಂತ ನನಗೆ ಒಂದು ಇಡ್ಲಿ ತರಿಸಿ ತಿನ್ನಿಸಲು ಅಕ್ಕನಿಗೆ ಕೊಟ್ಟರೆ.. ಅಕ್ಕ ನನಗೆ ಒಂದೆರಡು ತುತ್ತು ತಿನ್ನಿಸಿ ಒಂದು ಚೂರು ತನ್ನ ಬಾಯಿಗೆ ಹಾಕಿಕೊಂಡರೆ ಮುಗಿಯಿತು.. ನನ್ನ ಬಾಯಿ ಬೊಂಬಾಯಿ ಆಗುತಿತ್ತು.. ತಗೋ ಅಕ್ಕನಿಗೆ ಪೂಜೆ... 

******

ಬೆಂಗಳೂರಿಗೆ ಬಂದ ಮೇಲೆ.. ಹಬ್ಬ ಹರಿದಿನಗಳು ಅಂದರೆ.. ಕೆಲಸಕ್ಕೆ ಸೇರಿದ್ದ ಅಕ್ಕ ನನಗೆ ಮತ್ತು ನನ್ನ ತಮ್ಮ ಮುರುಳಿಗೆ ಬಟ್ಟೆ ತರುವುದು ಖಾಯಂ ಆಗಿತ್ತು.. ನಾನು ಮುರಳಿ ಇಬ್ಬರೂ ವಠಾರದ ಮನೆಯ ಬಾಗಿಲಲ್ಲೇ ಕಾಯುತ್ತಾ... "ಮುರುಳಿ ಅಕ್ಕ ಈಗ ಬರುತ್ತಾಳೆ.. ಇನ್ನೇನೂ ಬರುತ್ತಾಳೆ" ಅಂತ ಸಮಾಧಾನ ಮಾಡಿಕೊಳ್ಳುತ್ತಿದ್ದೆವು.. ಅಕ್ಕ ದೂರದಿಂದ ಬರುವುದು ಕಂಡೊಡನೆ ಇಬ್ಬರೂ ರೇಸಿಗೆ ಬಿದ್ದಂತೆ ಅಕ್ಕನ ಬಳಿ ಓಡುತ್ತಾ ಹೋಗಿ.. ಅವಳ ಕೈಲಿದ್ದ ಕವರ್ ತೆಗೆದುಕೊಂಡರೆ ರಾಜ್ಯ ಗೆದ್ದಂತೆ.. 

ಒಮ್ಮೆ ಒಂದು ಹಬ್ಬದಲ್ಲಿ ಹಣಕಾಸಿನ ಕೊರತೆಯೋ ಅಥವ ಆಗಲಿಲ್ಲವೋ... ಹೊಸ ಬಟ್ಟೆ ಬರಲಿಲ್ಲ.. ಆಗಲೇ ಸಂಜೆ ಎಂಟು ಘಂಟೆ ದಾಟಿತ್ತು... ಅಕ್ಕ ಬರುವುದನ್ನೇ ನಾನು ಮುರುಳಿ ಕಾಯುತ್ತಿದ್ದೆವು.. ಕಂಡ ಕೂಡಲೇ ಓಡಿದ್ದೆ ಕೆಲಸ.. ಆದರೆ ನಿರಾಸೆ.. ಅಕ್ಕನ ಕೈ ಬರಿದಾಗಿತ್ತು.. 

ಮನಸ್ಸು, ಮುಖ ಎರಡೂ ಬಾಡಿತ್ತು.. ಇಬ್ಬರೂ ಅಕ್ಕನ ಕೈ ಹಿಡಿದುಕೊಂಡು ಮನೆಗೆ ಬಂದೆವು.. ಬಾಡಿದ ಮುಖ ಕಂಡು ಅಮ್ಮನಿಗೆ ಅರ್ಥವಾಯಿತು.. ಅಕ್ಕ ಅಮ್ಮನ ಕಣ್ಣುಗಳು ಏನೋ ಮಾತಾಡಿದವು.. ಅಕ್ಕ ನಮ್ಮಿಬ್ಬರ ತಲೆಯನ್ನು ನೇವರಿಸಿ.. ಬೆಳಿಗ್ಗೆ ತಂದು ಕೊಡ್ತೀನಿ ಆಯ್ತಾ.. ಎಂದಳು.. 

ನಮ್ಮಿಬ್ಬರದು ಒಂದೇ ಹಠ ಹಬ್ಬಕ್ಕೆ ಬಟ್ಟೆ ಬೇಕು ಅಂತ.. ಪರಿಸ್ಥಿತಿ ಅರ್ಥ ಮಾಡಿಕೊಳ್ಳುವಂತಹ ವಯಸ್ಸಲ್ಲ.. ಏನಾಗಿತ್ತೋ ಇಬ್ಬರೂ ಅವತ್ತು ಹಠ ಮಾಡಿದೆವು.. ನನಗೆ ಮುರುಳಿಗೆ ಅಮ್ಮನಿಂದ ಕವತಾಗಳು ಬಿದ್ದವು.. ಅಳುತ್ತಲೇ ಇಬ್ಬರೂ ಮಲಗಿದೆವು.. 

ಬೆಳಿಗ್ಗೆ ಅಕ್ಕ ಬಟ್ಟೆ ತಂದು ಕೊಟ್ಟ ಮೇಲೆಯೇ ಮುದುಡಿದ ತಾವರೆ ಅರಳಿದ್ದು.. 

******

ಅಮ್ಮ ಶ್ರೀಕಾಂತ ಕಾಲೇಜಿಗೆ ಹೋಗುತ್ತಾನೆ ಪಾಪ ಒಳ್ಳೆಯ ಬಟ್ಟೆಗಳೇ ಇಲ್ಲ.. ಮುಂದಿನ ತಿಂಗಳು ಸಂಬಳ ಬಂದ ಮೇಲೆ ಬಟ್ಟೆ ತೆಗೆದು ಕೊಡುತ್ತೇನೆ.. ಹೇಳಿದಂತೆಯೇ.. ಮುಂದಿನ ತಿಂಗಳು ಎರಡು ಜೊತೆ ಪ್ಯಾಂಟ್ ಶರ್ಟ್ ಬಟ್ಟೆ ಬಂತು.. ಟೇಲರ್ ಹತ್ತಿರ ಹೊಲಿಸಿಕೊಂಡು ಬಂದ ಮೇಲೆ ಹಾಕಿಕೊಂಡು ನಲಿಯುವ ಮೊದಲು ಅಪ್ಪ ಅಮ್ಮನಿಗೆ ಮತ್ತು ಅಕ್ಕನಿಗೆ ನಮಸ್ಕರಿಸಿದ್ದು ಇನ್ನೂ ಹಸಿರು.. 

******

ಕಾಲೇಜು ಮುಗಿಯಿತು.. ಏನು ಮಾಡ್ತೀಯ.. ಶ್ರೀಕಾಂತ?

ಗೊತ್ತಿಲ್ಲ ಅಕ್ಕ.. 

ಸರಿ ನಮ್ಮ ಆಫೀಸಿನಲ್ಲಿ ಬಾ ಕೆಲಸ ಕೊಡಿಸ್ತೀನಿ.. 

ಹೇಳಿದಂತೆಯೇ ನನ್ನ ಮೊದಲ ಕೆಲಸ ಶುರು ಆಗಿದ್ದು ಅಕ್ಕನ ಆಫೀಸ್ನಲ್ಲಿಯೇ..... 

ಆಗ ಕಂಪ್ಯೂಟರ್ ಯುಗ ಆಗ ತಾನೇ ಕಣ್ಣು ಬಿಡುತ್ತಿತ್ತು.. ಕಂಪ್ಯೂಟರ್ ಕಲಿ ಒಳ್ಳೆ ಕೆಲಸ ಸಿಗುತ್ತೆ ಅಂತ ಹೇಳಿ.. ಆ ಕಾಲದಲ್ಲಿ ಸುಮಾರು ಹದಿನೈದು ಸಾವಿರ ರೂಪಾಯಿಗಳನ್ನು ಸಿದ್ಧ ಮಾಡಿ ಕಂಪ್ಯೂಟರ್ ಕ್ಲಾಸಿಗೆ ಸೇರಿಸಿದಳು.. ಅಲ್ಲಿನ ನನ್ನ ಬದುಕು ವಿಭಿನ್ನ ಹಾದಿ ತುಳಿಯಿತು. ಇಂದು ನಾ ಏನಾದರೂ ಆಗಿದ್ದೇನೆ ಎಂದರೆ ಅದಕ್ಕೆ ಅಡಿಗಲ್ಲು ಹಾಕಿದವಳು ಅಕ್ಕ.. 

******

ಮನೆ ಕ್ಲೀನ್ ಮಾಡುವ ಹುಚ್ಚು ಯಾವಾಗಲೂ ಇತ್ತು, ಇದೆ, ಇರುತ್ತೆ.. ಹಲವಾರು ಬಾರಿ ಎಲ್ಲಾ ರಂಪ ಹಾಕಿಕೊಂಡು ಒಂದೊಂದೇ ಜೋಡಿಸುತ್ತಾ.. ಕೆಲವೊಮ್ಮೆ ಸುಸ್ತಾಗಿ ಆ ಕಸದ ಮಧ್ಯೆ ಮಲಗಿ ಬಿಡುತ್ತಿದ್ದೆ.. ಸರಿಯಾದ ಸಮಯದಲ್ಲಿ ಅಕ್ಕ ಬರುತ್ತಿದ್ದಳು.. ಮುಂದೆ ಹೇಳಬೇಕೇ..  ಶಂಖ ವಾದ್ಯ... 

ಮನೇಲಿ ಇರ್ತೀಯ ಮನೆ ಕ್ಲೀನ್ ಮಾಡೋಕೆ ಆಗೋಲ್ವಾ.. ಸುಮ್ಮನೆ ಮನೇಲಿ ನಿದ್ದ ಮಾಡ್ತೀಯ ಅನ್ನೋಳು.. ಸಿಟ್ಟು ಬರೋದು.. ಆದರೆ ಕೆಲಸವಿಲ್ಲದೇ ವಿದ್ಯಾಭ್ಯಾಸ ಮುಗಿಸಿ ಮನೇಲಿ ಇರುತ್ತಿದ್ದ ನನಗೆ ಬೇರೆ ಮಾತುಗಳು ಹೇಳೋಕೆ ಸಾಧ್ಯವಾಗುತ್ತಿರಲಿಲ್ಲ.. 

ಸರಿ ಅಕ್ಕನ ಮಾತುಗಳು ಮತ್ತೆ ಬರಬಾರದು ಅಂತ.. ಮನೆಯನ್ನು ಸ್ವಚ್ಛ ಮಾಡಿ.. ಅಕ್ಕ ಬರುವ ಹೊತ್ತಿಗೆ ಮನೆ ಲಕ ಲಕ ಹೊಳೆಯುತ್ತ ಇರೋದು.. ನನ್ನ ಹಣೆ ಬರಹ ಅವತ್ತು ಅಕ್ಕ ತಡವಾಗಿ ಬರುತ್ತಿದ್ದಳು.. ಅಷ್ಟೊತ್ತಿಗೆ ಅಮ್ಮ ಬಂದು ಮನೆಯ ಸ್ವಚ್ಛತಾ ಕೆಲಸ ಅಡುಗೆ ಮನೆಯಿಂದ ಶುರು ಮಾಡುತ್ತಿದ್ದರು.. ಅಕ್ಕ ನೋಡೇ ಮನೆ ಎಷ್ಟು ಕ್ಲೀನ್ ಆಗಿದೆ ಎಂದಾಗ.. ನೀನಲಿ ಮಾಡಿದ್ದೀಯಾ.. ಕಸದ ಮಧ್ಯೆ ನಿದ್ದೆ ಹೊಡೆದಿರ್ತೀಯ... ಇದು ಅಮ್ಮನ ಕೆಲಸ. ಅಮ್ಮನೇ ಮಾಡಿರೋದು... ನೀ ನಿದ್ದೆ ಹೊಡೆದಿದ್ದೀಯ ಅಷ್ಟೇ.. ಎಂದಾಗ ಅಮ್ಮನ ಕಡೆ ನೋಡುತಿದ್ದೆ.. ಅಮ್ಮ ನಗುತಿದ್ದರು.. ಸರಿ ಮತ್ತೆ ಅಕ್ಕನಿಂದ ವಿಷ್ಣು ಸಹಸ್ರನಾಮ.. 

*******

ಒಂದು ಮನೆಯಲ್ಲಿ ಈ ರೀತಿಯ ಅಕ್ಕ ಇದ್ದಾಗ ಮನೆ ಕೆಲಸಗಳು ಆರಾಮ್ ಅನಿಸುತ್ತದೆ.. ಆ ಕಾಲದಲ್ಲಿ ಕೋಪ ಬರುತ್ತಿತ್ತು.. ಬಟ್ಟೆ ತರದೇ ಹೋದರೆ ಅಕ್ಕನ ಮೇಲೆ ಮುನಿಸು ಬರುತ್ತಿತ್ತು.. ಆದರೆ ಇಂದು ಅದೆಲ್ಲದರ ಹಿಂದಿನ ನೋವು, ಕಷ್ಟಗಳು, ಅವಳ ಸಾಹಸಗಳು ನೆನಪಿಗೆ ಬರುತ್ತವೆ.. ಹೌದು ಇವತ್ತು ನೂರಾರು ರೂಪಾಯಿಗಳನ್ನು ಸಂಪಾದನೆ ಮಾಡುವ ಯೋಗ್ಯತೆ ಇದೆ, ಯೋಗವೂ ಇದೆ.. ಆದರೆ ಅದಕ್ಕೆಲ್ಲ ಅಡಿಪಾಯ ಹಾಕಿದ್ದು ನನ್ನ ಪ್ರೀತಿಯ ಅಕ್ಕ.. 

ಸ್ಫೂರ್ತಿ ಬೇಕು.. ಹೋರಾಟದ ಜೀವನಕ್ಕೆ ಇಂಧನ ಬೇಕು ಎಂದಾಗ.. ದೇವರಲ್ಲಿ, ಅಪ್ಪ ಅಮ್ಮನಲ್ಲಿ ಪ್ರಾರ್ಥನೆ ಖಂಡಿತ ಮಾಡುತ್ತೇನೆ.. ಆಗೆಲ್ಲ ಫೋಟೋದಲ್ಲಿರುವ ದೇವರು  ಶ್ರೀ ನಿನ್ನ ಅಕ್ಕ ಒಬ್ಬಳು ಸಾಕು ಕಣೋ.. ಅವಳನ್ನು ನೋಡು ಸಾಕು ಎಂದು ಹೇಳುತ್ತಾರೆ.. 

ನಿಜ ಸ್ಫೂರ್ತಿ ಬೇಕು ಎಂದಾಗ.. ನಾ ಪುಸ್ತಕ, ಸಿನಿಮಾ, ಭಾಷಣ ಇದ್ಯಾವುದು ನನ್ನ ಗಮನಕ್ಕೆ ಬರದೇ ಅಕ್ಕನ ಹೋರಾಟದ ಸಾರ್ಥಕ ಜೀವನ ನೆನಪಿಗೆ ಬರುತ್ತದೆ.. ತಕ್ಷಣ ಒಂದು ರೀತಿಯ ಚೈತನ್ಯ ಮನದ ಮೂಲೆಯಲ್ಲಿ ಬೆಳೆಯುತ್ತಾ ಹೋಗುತ್ತದೆ.. 

ಇಂತಹ ಪ್ರೀತಿಯ ಮಮತಾ ಮಯಿ ಅಕ್ಕನಿಗೆ ಇಂದು ಜನುಮದಿನ.. ಕೊಡಲು ನನ್ನ ಹತ್ತಿರ ಏನಿದೆ.. ಆದರೆ ಅವಳು ನೀಡಿದ ಅದ್ಭುತ ಬದುಕಿನ ಸಾರ್ಥಕ ಕ್ಷಣಗಳನ್ನು,  ಘಟನೆಗಳನ್ನು ಹೆಕ್ಕಿ ತೆಗೆದು.. ಲೇಖನ ಮಾಲೆ ಮಾಡಿದ್ದೇನೆ.. 

ಅಕ್ಕ ಜನುಮದಿನದ ಶುಭಾಶಯಗಳು... !